恒生銀行（00011）副董事長兼行政總裁柯清輝（柯大俠）上月初宣布退休，以佢縱橫商界三十幾年嘅江湖地位，公告勇退咁大件事，城中名人點會無動於衷呢？尋晚恒生總行就搞咗個歡送酒會，到場嘅都係重量級人馬。
超人賭王等猛人出席
金管局總裁任志剛、長實（00001）主席李嘉誠、「賭王」何鴻燊等都係呢個簡單得嚟而隆重嘅歡送酒會座上客，喺恒生頂樓呢個居高臨下嘅大廳，大家都有講有笑，閃光燈亦閃個不停。以柯大俠同一眾政商界嘅友好關係，大家咁賞面實在冇乜出奇。
不過奇就奇在絲絲尋日下晝打算喺四季酒店High tea時，已經撞過柯大俠同埋恒生常務董事兼副行政總裁潘頌賢佢哋，同場出現嘅仲有新地（00016）郭氏兄弟（副主席兼董事總經理郭炳江及郭炳聯）添，唔通佢哋已率先趁午膳時歡送柯大俠？
午會郭氏兄弟惹遐想
咪住，恒生執董兼財務主管陳國威前幾日先被指會過檔新地，依家柯大俠又同新地密斟，莫非佢呢頭收山、嗰頭出山？
絲絲都係忽發奇想啫，事實係點大家可以自己揣摩吓，不過柯大俠喺下月六日嘅股東大會上正式退任就係鐵一般嘅事實，唔知到時會唔會又有歡送儀式？一眾股東又會對柯大俠有乜評價？絲絲拭目以待。
余絲韻