張紋嘉廚藝差 煮到一鑊粥

藝人張紋嘉（Crystal）與男友林子傑（Ronald）拍拖3年多，早前參加ViuTV節目《調教你男友》後人氣急升，成功以情侶檔密密搵真銀，殺出一條新血路！疫情之下二人較少外出食飯，改為在家中玩煮飯仔，Crystal笑指每日都好頭痛︰「因為要諗定煮乜嘢，通常都係我買餸，Ronald煮。我煮得唔好食，煮到一鑊粥！」她大爆經常被男友「投訴」大使︰「我最緊要係方便，會喺一間超級市場買晒所需要嘅嘢，但Ronald就會覺得應該去街市買平啲。」她指男友廚藝進步神速，開始研究較複雜的菜式。二人坦言享受私人時間，暫時未打算真正同居。