鄺潔楹練劍走火入魔 變甲組腳
藝人江嘉敏、鄺潔楹（Judy）與吳子冲等日前現身東區裁判法院外，為無綫新劇《七公主》拍攝外景。新劇開拍數月，嘉敏自爆暫時分別被兩人掌摑，第一個是飾演其姊的黃翠如：「佢同我講好驚，因為唔識打人，但佢打得唔痛嘅。」第二個則是「重槌手」利穎怡：「佢打開Boxing，打完我嗰下係呆咗唔知做緊乜，因為真係痛！好欣賞佢咁大膽拍落嚟，後尾都有同我講唔好意思。」她又打趣表示希望打破「定律」：「我發覺監製好鍾意我畀人打、畀人殺！」
有追求者：再了解吓先
至於Judy飾演實習事務律師外，真正身份是劍擊愛好者，有多場比賽戲份，令她大叫緊張！現實中吳子冲有廿年劍擊之齡，劇中亦有騷身手，Judy笑言有向對方偷師，而監製亦找來高手從旁指導，每當有時間就去練劍，但坦言對劍擊又愛又恨：「練完我隻腳粗咗好多！長期腫脹！反而上半身連塊面都瘦咗，睇番劍擊女子選手都係小腿粗過大腿，依家好Sad！」
提到月初生日，問到追求者可有行動？Judy怕醜說：「呢排開兩邊劇，仲未約到食飯！（有進一步發展可能？）我要再了解吓先，未深入咁傾到偈！」
