排戲前打餐飽 馬浚偉整傷手

藝人馬浚偉昨日與舞台劇《男人40 CEO》演員到電台受訪,見馬浚偉右手臂包着保護帶,他說:「因為知道要忙排戲,會冇機會打羽毛球,所以就狂打咗六日,結果就傷咗!」提到劇中有不少舞蹈場面,他笑言:「冇拋高黎瑞恩嘅動作嘅!最複雜嘅舞步已經排好,分別係米高積遜嘅《Thriller》同徐小鳳嘅《喜氣洋洋》,其中米高一段舞,我哋跳得好認真,亦估唔到咁似,連服裝都一樣!」

疫情近日再爆發,問到原定9月11日舉行的舞台劇會否延期,馬浚偉說:「巿民健康同公共衛生都好重要,如果8月下旬恢復番八成入坐就會繼續做,否則得一半就冇意思啦!因為冇咁多錢蝕呀!八成入座都話可以打成平手,但大家都好想做嘅。」