Tim慳學費幫囡囡退學
樂隊Dear Jane昨日三缺一到電台宣傳新歌《哀的美敦書》，提及第三波疫情大爆發，主音Tim表示會減少與囡囡外出，更自爆已幫本來就讀N班的囡囡退學：「最初話停學一個月嗰陣，就覺得唔對路退咗學，慳番啲學費，9月已經有學校收咗讀K1，但唔知開唔開到學，要睇大家夠唔夠力量撳實疫情。」又笑言囡囡現時「自由身」玩得好開心：「上星期諗住去主題樂園玩，但Feel到今次好勁，就取消咗。」
講到新歌，三子抵死大爆新歌是缺席結他手Howie的自身故事：「梗係等佢唔喺度講佢！之後會同導演反映吓，或者拍個MV外傳，搵佢做番男主角。」Tim又透露年底推出大碟，幸運地沒有因疫情影響做碟時間。