黃奕晨中場休息等復合
藝人黃奕晨（Dixon）與Super Girls的Cheronna（吳嘉熙）分手後，前晚與岑樂怡等一眾ViuTV藝人出席首映，Dixon明顯消瘦，講到分手一事，坦言是和平分手，直認可惜：「唔啱嘅話不如抖一抖，第時嘅嘢冇人知，我想專注工作，佢都有工作煩惱。（邊個講分手先？）大家有共識，可以話我開口先，大家都有唔捨得。」
認相處有問題
他承認相處出現問題：「完全唔關第三者事，可能係少少信任嘅問題。（Cheronna唔信你？）咁快估到？可能我畀人感覺唔夠成熟，佢有咁嘅諗法我唔怪佢，可能等我成熟啲、識生鬚就信得過。（因為佢Check得太緊？）唔係，佢冇乜點Check，只係大家有啲爭執。」有傳他搭上同公司的譚凱倫（Helen），他澄清對方是同事，有一大班同事食飯傾偈，但冇單獨約會。問到是否不肯結婚而分手？他說：「其實佢係我嗰個（結婚對象），所以依家先想中場休息，希望大家仲可以繼續發展落去。（唔排除有復合可能？）之後嘅發展冇人知，唔好搞到反晒面，朋友都做唔番，依家係對兩個最好嘅狀態。」他指雙方有聯絡，對方之前有問他取回物品，他又否認為情消瘦，因新戲角色要瘦一點。
岑樂怡撞到正
岑樂怡早前到丹麥出席好友駱振偉婚禮，表示第一次「撞鬼」，在酒店睡覺期間突然全身不能動彈：「全身畀嘢壓住好痹，跟住我喪爆粗十分鐘就冇事。」
