何猷啟添「得意妹」賭王兩個月抱三孫

快將生日的賭王何鴻燊，三、四房子女不停為何家增添新成員，送上最佳「生日禮物」賀壽。四房女兒何超盈於9月底誕下B女「荷包蛋」辛千覓後，細佬何猷君太太超模奚夢瑤上月底誕下何家長孫「荷葉飯」何廣燊，做婆婆後隨即又做嫲嫲的四太，很開心仔女生個「好」字，還笑言自己是「嫲婆豆腐」。

而三房兒子何猷啟太太Gigi上月順利生產誕下二女，原定本月初產期，但B女急不及待出世，Gigi已出院在家中坐月及專心湊B。再為人父的猷啟開心分享喜悅：「多謝大家關心，母女平安，好開心再做爸爸，依家太太坐緊月休息緊，BB女跟家姐英文名都係T字頭，叫Tylia。」

超蓮讚B女又白又靚

三太昨日中午現身醫院探賭王，一身輕便裝扮的她，被問到孫女何時出世？她以一貫低調作風，沒有回應，急急腳步入醫院。而猷啟孖生家姐何超蓮接受電話訪問時，透露好開心再做姑媽，大讚BB又白又靚好得意。問到BB英文名Tylia是否有特別意思？她說：「冇特別意思，因為家姐都係T字開頭（Tittania），純粹好聽！（BB幾時出世？）想低調啲，畀多啲空間佢哋。」猷啟兩年抱兩，大女Tittania於2018年出世，同樣十分低調。