苟芸慧嬲老公奄尖壓力大狂脫髮
藝人苟芸慧（苟姑娘）昨日以一身紅色打扮，現身商場的聖誕活動，她透露剛考完法式糕餅試，完成課程後便可在法國開店，問到是否真的有意在當地創業？她說：「都可以當係一條後路，依家係為興趣，將來冇人知，睇吓有冇人有興趣投資或合作。我遲啲都會去法國睇吓個環境，當係朝聖。（喺香港開店？）暫時未有呢個想法，除非有人合作。」
押後生B 搏殺多兩年
講到學整甜品，最大受惠者是否老公陸漢洋？苟姑娘笑言每次給他試食，都有很大壓力：「佢對食好挑剔，有好多唔同意見，好夠膽批評！最初都有少少嬲，後來冷靜咗會諗點解佢咁講，再諗點樣可以做好啲。」又指老公不止識食，還廚藝了得，擅長中菜及法國菜：「前排要忙考試又要煮畀佢食，因為壓力太大，甩咗好多頭髮。但完成咗個考試，真係好有成就感。」
至於生B大計，苟姑娘稱要再押後：「之前老公定咗三年後生，依家仲有兩年，趁呢兩年時間工作，充實吓自己。1月會有部電影開拍，停咗幾個月再拍戲，好似變番BB咁！」聖誕則會跟老公一齊做甜品慶祝。