吳若希呻囡囡有異性冇人性
歌手吳若希（Jinny）昨日到電台出席活動，透露兩歲囡囡Giselle十分喜歡返學，笑言鍾意到令她感到傷心，要用工作自我麻醉：「佢就連放假都想返學，提起就唔開心，每日返學都直入校門，今日返學冇同我講Bye Bye！（識咗男友？）佢會摸男仔，又有個女同學每日會等佢放學先肯走，好得意。（鍾意個男仔？）希望唔好，佢老竇返到屋企有同佢訓示，話唔使旨意拍拖，要18歲之後先可以。」
上床慶祝結婚兩周年
日前「雙十」是Jinny的結婚兩周年紀念日，問到如何慶祝？她抵死說：「早啲上床……瞓覺！太攰喇，日日七點起身湊返學頂唔順。（收到禮物？）冇！超平淡咁過，想上床睇戲，片頭一出就瞓咗。」又指老公雖然跟她補祝，但他只負責買餸，煮飯重任交給家傭，最後Jinny更爆Seed「投訴」老公：「佢喺我去日本拍嘢嗰陣，同啲朋友去泰國玩，要老爺奶奶幫手睇住個女。（佢有冇去蒲？）冇！佢飲醉返咗酒店！身邊太多線人，佢一出街就會有人Send相畀我，太放心喇！」
講番為電台的廣播劇錄音，Jinny笑言是抱學習心態而來，問到會否母女檔演出？她說：「等佢咬字清晰啲、唔好再講BB話就會帶佢去，合唱都唔錯！」問到可會想囡囡長大後做歌手？Jinny即耍手擰頭：「咁又唔好。（想佢做醫生、律師？）哈哈！係囉，做醫生幫到人，做護士都好。」