傅明憲心痛90歲父：想攞番啲錢養老
傅明憲父親日前入稟向前女婿葉劍波追討500萬元，昨日傅明憲出席活動時表示，爸爸借錢給其前夫搞上市，但對方未有按合約還錢，年屆90歲的爸爸希望取回該筆錢養老，令她很心痛。
藝人傅明憲、郭秀雲與兒子龐景峰、JW（王灝兒）及余香凝等，昨日到荃灣出席活動。談及爸爸傅國梁（藝名傅奇）入稟高院向前女婿葉劍波追500萬元，傅明憲說：「件事係2014年底，葉劍波搵我爸爸支持佢搞上市集資，爸爸好錫佢，想佢東山再起，所以2015年1月畀咗500萬支持佢，合約寫明18個月後歸還1,000萬。」不過對方最終沒上市，亦沒有還錢。
荒島與鯊同游
她續說：「期間爸爸有用短訊追問，但對方一係遲覆，一係就話仲努力緊。但今年爸爸都90歲，年紀大，唔想等啦，想攞番啲錢養老，冇辦法下搵律師入稟。令到爸爸咁擔心，我都好心痛，佢好無奈又有口難言。」問到可要上庭或庭外和解？她說：「如果爸爸90歲仲要打官司，由加拿大返嚟香港出庭會好辛苦，希望件事快啲解決。」她曾就此事聯絡前夫，亦有向對方追討，爸爸亦有寫信給對方，但未有回覆。提到近況，她透露剛去完哥斯達黎加一個荒島潛水睇鯊魚，雖然當地曾發生鯊魚咬死人事件，但她不緊張，因對潛水教練有信心。
郭秀雲讚準新抱
至於郭秀雲剛在日內瓦出席關於野生動物管制的會議，宣揚愛護動物。提到中秋節將至，她表示會留在香港，問到兒子龐景峰可會帶女友回家食飯做節？她大讚兒子女友：「我哋成日見，佢好入屋。佢好好，有時我攰，又有茶同糕點招呼。」JW則透露中秋節會到澳門工作，問到男友可會同行？她笑說：「唔知呀！都有叫啲朋友睇吓會唔會一齊去。（上男友屋企食飯？）一定會，但未肯定點安排。」又表示小時候會去維園玩燈籠，亦很喜歡吃月餅：「專揀好大個蛋黃食，一次可以食一半，但依家只可以食細細舊。」