黃子菲胎兒性別賣關子

英皇集團主席楊受成兒子楊政龍的網紅女友黃子菲（Ava），早前宣布快將做媽媽。昨日她現身旺角，為其格仔寄賣位宣傳。穿着T恤及半截裙的她肚凸凸，透露現時懷孕逾3個月，體重103磅，比未懷孕重了5磅：「初初三個月好辛苦，作嘔但嘔唔出，食嘢冇胃口。但好奇怪，以前唔鍾意食意粉，突然會食。（佗仔定女？）冇講畀人知，只得爹哋媽咪知。（朋友唔知，咁送咩畀你哋？）送BB床囉！（買粉紅色定粉藍色？）呢個唔講。（幾時結婚？）生咗BB先決定。（婚紗相到時先影？）係，依家肥。（影大肚寫真？）可能過幾個月，等個肚大啲，會同BB爹哋一齊影。」