祖兒獻身做嘉賓 蔡一傑派檸檬
天后容祖兒第15場《PRETTY CRAZY演唱會》邀得草蜢三子擔任嘉賓，她向蔡一傑自薦做演唱會嘉賓，可惜慘遭拒絕。而蔡一智踢爆祖兒是「瘋后」，指她曾在馬路上暴走，完全無懼被車撞。
祖兒經過休場一天後，前晚叉足電再開紅館騷，她以「三隻昆蟲」介紹草蜢成員蔡一智、蔡一傑及蘇志威出場。四人合唱《失樂園》及《ABC》後，祖兒恭喜傑仔將於10月假伊館開個人演唱會，並自薦擔任嘉賓：「好多人情要還嘅，你個演唱會需唔需要請嘉賓？」可是傑仔尷尬反問：「你係咪好想？我有個空缺，你想唔想玩另類啲做和音？」當眾被請食檸檬的祖兒呆一呆才說：「我唔熟喎！」
任摸唔嬲
食了「誠實豆沙包」的傑仔驚覺失言，急得滿頭大汗補鑊說：「我意思唔係推你，你嚟我絕對歡迎，咁大家記住嚟睇，有祖兒呀！我係唔好意思， 你作為天后級。」祖兒打圓場說：「你咁難得自己開演唱會，你唔使唔好意思。你又係小嘢咩？你都係Diva。」蘇志威加把口緩和氣氛：「傑仔話好難得丟低我哋兩個自己玩呀。」傑仔隨即轉話題，讚祖兒舞衣有型：「成件鴕鳥毛咁。」祖兒風騷揈舞衣說：「係？你摸吓。」傑仔問：「我摸邊度？你咁樣揈住埋嚟。」她笑說：「你想摸邊度？」全場哈哈大笑。
馬路暴走
之後蔡一智爆祖兒「瘋狂史」，有次約她行山，路程崎嶇又要行馬路，初時擔心車來車往會嚇親祖兒：「我仲諗緊佢貴為天后，怕唔怕，點知佢竟然好雀躍，仲喺馬路單腳彈彈吓，又話咁大個女未試過喺馬路行，我幾驚佢畀巴士撞。」祖兒亦自爆瘀事，出場前被反鎖在廁所中，要勞煩工作人員營救。
另外，在無綫劇《真情》飾演「容姨」、月底踏入88歲的譚倩紅於台下High爆睇騷，祖兒在社交網留言多謝前輩捧場：「如果到80歲時，仲可以咁精靈，一定繼續開騷。」