湊女教水撞晒期 黃澤鋒愈辛苦愈開心
藝人黃澤鋒、郭思琳、可嵐、蕊蕊、錢小豪等昨日出席泰拳活動，講到太太上月誕下囡囡，黃澤鋒一臉慈父模樣表示：「呢幾個月係好辛苦，因為要餵夜奶，太太坐緊月，暑假又係教游水同教拳嘅旺季，不過辛苦都好開心，個女依家廿幾日大，我好珍惜呢啲時間，可能一生人得一次。（即係太太唔會再生？）唔知，我冇所謂，但太太身體最緊要。」他笑言對住囡囡惡不起來：「佢一喊，就會話『唔好喊，錫啖你啦！』」
同場的郭思琳透露9月會到日本參加巴西柔術比賽：「我白帶時冇參賽，反而升咗藍帶先去，由BB班升去中學。（一嚟就高難度比賽驚唔驚？）超驚，所以依家一星期起碼練三、四日。（怕唔怕受傷或毀容？）唔係好驚，係驚自己啲關節問題，最多斷手斷腳，哈哈。」