羅霖寸劉坤銘講嘢識包裝

藝人羅霖前晚於尖沙咀出席晚宴活動，提到前夫劉坤銘近日爆新戀情，女友是現職香港基督教女青年會總幹事楊建霞（Yvonne），有指二人交往已一段日子，但劉坤銘稱尚未正式介紹女友給三個兒子認識，羅霖即踢爆：「我知道好耐，係啲仔話畀我聽，囝囝都同過佢哋旅行！我個人比較直，有嗰句講嗰句，我唔會好似人哋咁識包裝。（傳佢哋有意結婚？）我驚講咗唔係咁適合，總之佢哋一齊咗一段時間，都同得我啲仔去旅行，據我所知佢哋都好多年喇，當然希望佢哋開花結果，祝福佢哋。」

問到有否擔心兒子唔開心？她說：「依家已經好啲，因為已經係幾年嘅事，初初有擔心，依家冇，啲仔都大，我又開解佢哋，慢慢接受。（依家相處得幾好？）呢樣唔講得，反而啲仔成日叫我搵番個伴，好感動三個仔咁錫我，等佢哋大學畢業先再考慮。（介唔介意畀人將你同前夫女友比較？）唔介意，每個人都有優點、缺點，佢都唔係娛樂圈嘅人，冇得比較。」提到之前被拍得於澳門與男士相聚，她解釋只是生意上朋友：「朋友都驚咗同我去食飯，食飯都叫我搵個隱蔽啲嘅地方。」

北上工作要執生

另外，她透露落實於廣州舉行寫真集簽名會，因主辦單位已答應安排保安。問到可擔心有熱情粉絲衝上台？她說：「唔擔心，因為有保安，同埋我都識執生，相信我啲粉絲唔會咁猖狂。」

而晚宴上，鄭明明及葉家寶獲頒授美國格林威爾大學國際榮譽院士榮銜，身為「國際親善大使」的羅霖則表示，未來目標是多參與慈善工作。