陳思銘約唐詩詠撐枱腳
被譽為「絕世好女友」的唐詩詠，早前被傳與「補習界王力宏」陳思銘拍拖。昨日陳思銘出席香港開電視節目巡禮時，承認與詩詠是好朋友，會繼續約她吃飯撐枱腳。
藝人陳慧珊、楊思琦、楊羚、方健儀、李尚正及盧頌恩等為香港開電視節目巡禮宣傳新節目。與唐詩詠傳緋聞的陳思銘處男演出，與黃心美主持《男士堂》，問到首次做主持可有請教緋聞女友？他笑言：「好主意，但未有。（叫詩詠捧場？）唔好啦，始終係第一次。我覺得幾有趣，因為好多新嘗試，但成日NG，搞到工作人員好冇癮。」
楊羚廚藝OK
提到他與詩詠早前被拍得一齊買餸，他說：「買餸啫，朋友食飯好正常。（邊個負責落廚？）係成班朋友。」問到可有發展機會？他尷尬笑說：「諗住你哋問啲問題好輕鬆，我哋真係好朋友。（Keep住去食飯？）去食飯，冇問題吖。」問到詩詠是否符合擇偶條件？他笑言：「合乎晒所有電視觀眾條件，蘇醫生（詩詠《白色強人》角色）咁受歡迎，我有捧場。（同馬國明拗手瓜？）佢做戲都好睇，但我未見過佢真人。」
同場的楊羚表示任節目《30分鐘大放餸》嘉賓：「雖然廚藝唔能夠同『藍帶』廚師比，但都唔差，要煮一圍難唔到我，始終做咗阿媽咁多年，廚藝都OK嘅。」
