張振朗怕醜歎慢板女友彈鐘

張振朗在無綫劇《包青天再起風雲》演「展昭」，何家勁當年演相同角色成為經典，即使往後有不同藝人演過此角，卻始終未能超越他，張振朗坦言當初收到劇本亦不斷否定自己，幸而最終描述為「少年版展昭」，他才放下心理包袱。

碌地被Cut戲

為了應付劇中連場動作戲，開拍前即使半夜收工，張振朗亦甘願犧牲瞓覺時間操肌，豈料後來卻意外傷腰，未能在最佳狀態下開工：「開頭拍要用拐杖，係有啲失落，點解個天要畀呢個考驗我？所以休息兩個多月拍住文戲先，將所有動作戲放喺最尾30日，好高難度，由07打到18，再接文戲。（最難係邊場戲？）有場戲係譚俊彥策騎，我要跳上去，結果跌咗落地4次，有次仲喺地下10分鐘郁唔到，但最終個鏡頭剪咗，都有啲可惜！」

劇中與傅嘉莉有感情線，卻因角色性格怕醜，令她轉投別人懷抱，張振朗自嘲形象大膽花弗，現實中面對感情同樣怕醜：「我要相處吓先，唔會幾日就叫人拍拖，都有失敗過。（女友楊偲泳係你主動出手？）係我追佢，都係相處咗一段時間先，開頭亦有畀佢拒絕，最終都成功。（幾時成家立室？）我哋都拍咗一段時間，有共識，但女友都鍾意演戲，呢個係雙方溝通橋樑，所以等大家事業有成先再傾。（畀幾耐時間先結婚？）等有事業先，依家冇車、冇樓，唔好諗住。」

劇集被抽唔怨心穎

此外，去年拍攝的幾套劇集，其中兩部因黃心穎偷食事件致播出無期，張振朗坦言曾感不快：「第一次做男主角喎！好在我比較樂天派，相信始終一日會播，試問邊個藝人試過一連幾套劇冇得出街？不過凡事兩面睇，我揀積極面對。（嬲黃心穎？）一啲都冇，本身係朋友。（等佢回歸？）睇公司安排，忘記過去，展望將來啦！」

場地：桔梗