葉巧琳擺陣催運掛畫有漏洞
歌手葉巧琳（Mischa）自細受媽媽影響，對風水命理產生興趣：「一出世媽咪就拎我個時辰八字去算命，批我有80幾歲，覺得寧可信其有，不可信其無，做到就做，參考吓。」她坦言現時最想改善事業運，自爆由樂隊Trekkerz單飛發展後就搵師傅改名，又依照吩咐在家擺風水陣︰「有三樣嘢要擺，長命燈、一支蕭同一幅畫。」
Mischa家中掛有一幅少女及兩隻貓賞月的油畫，堪輿學家陳定幫表示︰「呢個係一個比較孤獨嘅格局，就好似單人喺路上難搵知音人，如果佢想事業運好啲，可以換幅冇咁孤獨嘅畫，或者可以試吓改名。『葉巧琳』呢個名嘅筆畫，如果女性用就容易比較孤寡，成個名嘅『三才五格』入面有兩個凶數，其中一個就話佢要靠自己多啲，其他人較難幫到佢。」並提議她今年在西北位擺放紅色及紫色的物品，藉此增強事業運。