組合Super Girls成員蔡明思（Jessica）將於今年10月成為人妻，下嫁拍拖多年的男友陳冠廷，二人於月初入紙排期註冊，其擬結婚通知書正式曝光，發現一直報稱32歲的她，原來實際是34歲。
Jessica今年4月於社交網報喜，宣布與拍拖六年的台灣男友「陳冠」拉埋天窗，婚禮安排於今年10月底舉行，屆時會飛到台灣擺酒，所有傳統儀式都會做足。雖然不會在港補擺喜酒，但二人本月初已在港入紙排期註冊，其擬結婚通知書正式曝光。不過記者發現原來新郎哥真名叫陳冠廷，細Jessica三年多。而維基百科資料顯示Jessica為32歲，但原來她是1984年11月15日出世，即34歲，惹來一直「報細數」之嫌。
本報昨日向Jessica求證，她指從來沒隱瞞年齡：「我真係冇隱瞞自己年齡，由頭到尾都冇同人哋講我幾多歲，係1984定1986年，因為我哋一開始做組合時，公司都唔希望我哋報個年齡係好大呀，叫我哋盡量唔好報自己年紀，所以每一次出去做訪問，如果咁啱有人問嘅話，通常我都會講其實我已經好大個o架啦，我係年紀最大，唔會直接同佢哋講我係1986年，只好搵個方法避呢條問題，我真係唔想講呢啲大話去呃人，我覺得好無謂，同埋1984年同1986年都係差兩年，都係3字頭。」
問到可介意被揭是34歲？她說：「我唔係好介意人哋知我真實年齡，反而係介意會唔會去呃人呢樣嘢，我由頭到尾都同公司講，我唔想報細數，因為如果畀人知係好核突嘅事，仲幾希望畀人知我係1984年出世，因為我覺得年紀唔係咩問題。」