胡鴻鈞硬晒軚出院腦震傷失憶易暈
歌手胡鴻鈞早前拍攝《降魔的2.0》吊威吔的戲份時，從高處空墮下撞傷頭部，一度傳他昏迷入院，幸經過十日留院治療後並無大礙。昨午3時許，身穿全黑運動裝、戴口罩的他在經理人陪同下出院，步履遲緩又頸梗梗，似乎不能太大郁動，但仍先後兩次向記者打招呼及企定定拍照，但自嘲「醜樣」而婉拒除口罩。
問到康復進度，胡鴻鈞細聲虛弱說︰「進展OK，醫生話要繼續休息，大約要幾個月時間，好睇個人狀態。（撼到個頭邊度？）唔係好記得咁多嘢。（有休克？）唔記得，要問番同事先知，已經做晒腦部檢查，全部OK先出院。（頭撼地有流血？）冇！只係震傷咗腦入面。（撞完有冇失憶？）多多少少都有，依家會容易眼瞓同暈，但醫生話係正常。（有冇後遺症？）醫生話如果我乖乖哋聽話休息就冇事。（套劇拍晒未？）已經尾聲，都仲有吊威吔戲份。（搵替身？）睇公司安排。」
講到早前吳若希透露6月中會跟他到美國開騷，胡鴻鈞表示希望盡快康復，稍後都要覆診。他交代完病況便雙手合十登上保母車離開。
