天堂鳥Lincoln空翻跌斷手專人餵藉
男子跳唱組合BOP天堂鳥成員Lincoln，排舞時發生意外，右手骨折送院。隊友Gordon與Tyrese前往探望，Lincoln一臉鬚根，Tyrese見他如此慘情，即餵他食提子和蛋撻，盡顯兄弟情！
兄弟笑「玻璃身」
出事當日，Lincoln正練習後空翻動作，怎料右手落地時不穩倒地，送院後證實右手前臂骨折，要動手術鑲螺絲及鐵片固定，預計6至8星期才康復，他說：「跌低嗰剎那，只係感覺手臂好痛，白車嚟到先知右手斷咗，擔心影響之後嘅工作，同埋兩位兄弟嘅演出。」Gordon卻取笑他：「佢好精神，仲識講笑，話下次實冇事。我哋笑佢係玻璃造，成日整親呢度嗰度，今次呢鑊咁嚴重，希望佢真係聽聽話話休息。」
Tyrese則指Lincoln平日做任何運動都不錫身：「好早已經有好多人提醒我哋要好好睇住佢，估唔到真係收到電話，話佢斷咗隻手，不過見到佢咁痛，又唔忍心話佢，盡量幫佢，等佢快啲好番。」Lincoln揚言已學乖，會好好休養，不敢亂動，未知緋聞女友「美女學徒」鍾晴會否煲湯讓他補一補？