葉蒨文愛到發燒扭腰撐阿Lam
殿堂級歌手林子祥（阿Lam）一連五場假紅館舉行的《LAMUSICAL2019演唱會》前晚圓滿結束，相信因尾場關係，他特別大感觸而多度落淚：「呢幾晚都喊乾咗。」除了邀請80多歲的英籍老師上台外，全晚高潮位就是曾講明不會獻唱的太太葉蒨文（沙麗）於「安歌」時壓軸登場，在全場歌迷陷入瘋狂下，兩夫婦合唱了《敢愛敢做》等三首歌，沙麗更跳到扭晒腰，又和老公抱抱，唱到晚上11時半才完騷。
投入開騷變喊包
慶功宴上，個唱創作總監鄭丹瑞宣布阿Lam將舉行內地巡迴演唱會，談到阿Lam變喊包，他解釋：「我唔淨係覺得表演，好似睇緊戲咁，好投入。」沙麗笑老公每首歌都忍不住淚水，又說突然上台全因受感動：「到呢個年紀係咁o架啦！睇到佢哋種呢棵『樹』，最後變咗一棵好大嘅『Beautiful Tree』，呢棵『樹』永遠喺大家嘅記憶入面唔會忘記。」阿Lam指太太投入每件事時就會插手，多得太太了解他，他「慳番啖氣」少說話。
問沙麗可計劃開個唱？她說暫不多想，只全力幫老公搞巡迴騷，自爆不想阿Lam擔心，隱瞞曾發燒，服食成藥「頂硬上」，阿Lam聞言即笑問：「愛到發燒？」沙麗冧爆說：「都OK喎！」聽見沙麗說很多歌都不識，阿Lam又冧太太說：「你未出世嘛！」