陳松伶冧招晚晚講「我愛你」
事業、家庭兩得意的陳松伶，自爆與老公張鐸有特別的相處模式，曾經被指好保守的她會時刻將「我愛你」掛在口邊，老公除了愛錫她，她更感謝老公教識她投資。
歌而優則演的陳松伶原來愛品酒，對香檳情有獨鍾，近日她帶了香檳以嘉賓身份亮相東網巨星節目「海馬牌床褥特約」《閨蜜睡房》，跟主持人俞詠文（Angela）一邊暢飲一邊分享她與老公張鐸的婚姻生活。松松自嘲好囉唆，但老公比她更甚，她笑說：「呢啲咪糯米治木蝨，好驚佢哦我，佢好似一個老師，我哋兩個相處嘅方式就好似兩個律師喺度傾偈，不過我哋大家都講道理嘅。」
學識錢搵錢
松松在投資方面好有眼光，愛買磚頭的她覺得最保值，卻自嘲不識投資，她說：「我好多謝我先生，佢從大學畢業就好有賺錢同生意頭腦，我從佢身上學識點樣將好少嘅錢做到最大化，而佢會同我商量，大家互補不足，佢又好相信我眼光，我會將家長教落嘅訊息話佢知，買磚頭地點係好重要。」
她跟老公非常恩愛，除了每晚都會跟老公講「我愛你」，她笑說：「Anytime都會講！」拍過很多戲的她，當年合作的都是當紅小生，有鄭伊健、古天樂、張智霖等，問到哪位最啱做她老公？想知道松松點揀？記得本星期五、六、日收睇《閨蜜睡房》！