祖兒18場紅館騷破個人紀錄
天后容祖兒為慶祝入行20周年，將於8月5日開始在紅館舉行《PRETTY CRAZY容祖兒演唱會》，昨日舉行記者會宣布再加開6場共18場，打破她在紅館的個人紀錄。聲沙抱恙的她笑言會盡快康復，不想觀眾捧場變「探病」。
穿黑色白波點蝴蝶結Tube dress的祖兒，在俄羅斯全男班Brevis Brass Band伴奏下出場，聲沙沙的她說：「唔好意思，把聲變咗。依家病咗先，到演唱會就會完全冇事，龍精虎猛。」
唔想觀眾「探病」
祖兒獲大會送上一張貼滿她60張專輯的成績表，表揚她20年來奪700多個獎項，成為香港歌手之冠，她笑言：「最神奇係我仲好年輕呀！」並指個唱會請嘉賓演出：「以前想霸晒啲時間，但今次係20周年，想介紹番同自己喺音樂路上擦出火花同靈感嘅前輩、同輩同後輩，分享呢份喜悅。」現場見她的Tube dress不時微微下滑，要不時拉高裙頭兼按心口，事後她幽自己一默：「同我演唱會一樣好評（平）如潮呀！」
祖兒表示上周已開始感冒，之前又要返內地錄影真人騷及拍廣告，故已向公司表明6月後不接工作，專心綵排個唱：「公司真係冇性o架，塞晒啲工作畀我，真係以為我係Marvel入面嘅Avengers打不死。咁依家都好，病咗先，嚇吓佢哋，等佢哋知道我會病。」又指18場演出，最大挑戰是體力：「希望觀眾入場睇精神嘅我，唔係嚟『探病』。」
笑張敬軒「妖孽」
問到可會邀請近日惡搞她的好友張敬軒任嘉賓？她笑言：「嗰隻妖孽！我強烈要求佢着番『火龍果』造型嚟。佢事前有問我擔唔擔心影響我，我話你擔心自己先啦，冇晒形象呀！佢都去到唔止底線，佢下次仲可以拍乜？我都擔心佢以後條路點行落去，佢用咗一晚去拍個惡搞MV，我好感動。（如果軒仔開騷，你惡搞報答佢？）一定唔會，玩到咁我認輸，佢黐線嘅，搵人拉佢！」