朱晨麗日夜趕劇攰到棟篤瞓
藝人朱晨麗（朱朱）、龔嘉欣最近因拍新劇，每日只瞓得四粒鐘，為了爭取時間休息，兩人齊齊練成「隨時瞓」神功，一有機會便攝位補眠，朱朱更試過企住瞓，「功力」超凡！
朱晨麗、龔嘉欣早前於電視城拍攝無綫新劇《大醬園》，因為趕開工，兩人每天只能瞓四小時，只好爭取時間休息，趁空檔「攝位」瞌一瞌補眠，朱朱笑言：「我食飯、沖涼都會瞓，坐喺度唔夠5秒就瞓；試過搭巴士，企喺度都瞓着咗，有次對腳屈一屈，差啲跪咗落地！」
今次拍劇，朱朱除了要捱眼瞓，還要講大量歇後語，苦背對白：「劇中韋家雄演我師父，佢成日引我笑，當我收到劇本時，有諗邊個做我師父，其實有幾個我係唔想，其中一個就係韋家雄，因為佢太搞笑。」
四劇未播怕睇到滯
龔嘉欣之前拍《殺手》經常殺人，今次要殺朱朱劇中養父江榮暉，可謂駕輕就熟。談到每日只瞓得四粒鐘，她亦笑言已練成隨時隨地可以入眠，並要靠零食來提神！對於她首次擔正的《堅離地愛堅離地》因黃心穎而被抽起，問會否感失望？嘉欣說：「我仲有《包青天》同《殺手》未播，連埋《大醬園》同《堅離地》即係有四套劇未播出街，我諗觀眾都唔想見到我咁密，怕會膩。」
