陳煒搶蟹執輸 街市怒喝師奶

陳煒近年拍無綫劇人氣急升，加上美食節目《煒哥的味道》令其美女廚神形象入晒屋，獲邀請拍攝首個代言人廣告。煒哥日前去街市拍攝，她的出現令一眾趕買餸的主婦停步湊熱鬧，有人高呼「好靚女」，亦有人把握機會翹手臂「集郵」，煒哥來者不拒，氹得她們相當開心！

不過，鏡頭前煒哥卻要與一班師奶爭買餸，她游走菜檔、海鮮檔及肉檔入貨，但每逢出手即遇「師奶團」搶灘，被搶菜、搶肉，連去到海鮮檔買蟹都被師奶一手搶走，嬲得煒哥大叫：「隻蟹我o架！」

冧掂檔主買靚料

煒哥表示本身亦是街市常客，小時候已經跟媽媽出入街市，而長大後常買食材煲湯：「唔食嘢都要煲靚湯，呢個街市係我放工返屋企必經之路，買肉、買豬骨煲湯。（見你街坊，會計平啲？）就算唔平畀你都畀最靚、最新鮮嘅，有人會請教我點煮，所以都好驚喜！」又大讚檔主熱情，笑說：「最緊要同檔主熟，咁佢哋先會畀好嘢你！」

隻蟹我！ 陳煒同師奶爭買餸，搶到火滾！

美女廚神出巡，豬肉檔員工急急「放下屠刀」集郵！

拍節目「兩手準備」

問到準備何時再拍《煒哥的味道2》？她說：「我都有問杜之克，話：『我冇嘢做啦，點算？』佢都話好快會開。」是否要好好準備？她舉起雙手笑說：「已經有兩手準備啦，有齊晒，唔使擔心！」至於今次代言酬勞？她坦言：「大家係第一次合作，亦係我破紀錄最高，合作班底又係好熟，所以好開心！」