小儀大讚:正呀!

與金剛合作無間的小儀,得悉對方有新戀情大呼好正兼恭喜,笑言叫他包機票住宿到台灣飲喜酒:「金剛依家喺台灣,上次佢返香港做嘢,我有搵佢飲嘢,即晚佢就走。(佢春風得意?)不嬲都春風得意,有冇拖拍都係咁。(金剛女友樣靚身材正?)佢係鍾意呢類型身形同靚女,佢覺得自己係夏威夷人,哈哈!鍾意啲健康膚色嘅,正呀!」

小儀笑言金剛一向甚有女性緣,皆因他醜樣:「佢咁醜樣所以易埋女仔身,啲女仔冇戒心,如果好靚仔,啲女仔反而會驚!我冇同佢拍過拖,不過做朋友係OK,佢真係好Gentleman,買咖啡都會叫助手買埋我嗰杯,我生日又買禮物,我不嬲話佢人好OK,如果佢靚仔啲仲得掂?」曾與金剛傳緋聞的張嘉兒也戥對方高興,大讚兩人陽光又有紋身好合襯。