金剛霸氣晒32D新歡：我的女人！

來自台灣、現年38歲的金剛自從2016年宣布和藝人陳蕊蕊分手後一直單身，直至昨日他突然上載一張「情侶視角」的相片，宣布打爛三年「Dry缽」，和現年28歲的台灣饒舌歌手梁云菲（Nana）拍拖！相中他伸手捏着Nana的臉並留言：「對誒 我的女人。」而Nana同樣上載一張捏着金剛臉的相片留言：「小子，給你賺到了！」正式公開情侶關係！放閃後，大批藝人紛紛留言恭喜，胡蓓蔚更留言：「溫柔一點。」李璨琛就搞笑指：「似你個女多啲喎！」金剛風騷回應：「不是妹妹嗎？」至於Nana更公開「獻吻」，在金剛認愛的博文中加了香吻的表情符號。其實在「封盤」前已有網民發現兩人關係不淺，不約而同網晒身處台灣墾丁及「撞鞋」照。

「唔靚仔都有優點」

昨日金剛接受本報電話訪問，對女友讚不絕口：「拍咗拖冇幾耐，幾個月咋，佢人好好，好溫柔、好體貼，大家溝通到，之前試過其他嘅，好似嗌交咁，呢個冇交可以嗌，同埋佢好樂觀，同佢一齊好舒服。」Nana以32D火辣「胸器」見稱，但在他眼中，內涵最為吸引：「唔會冇安全感，佢好乖，好鍾意喺屋企。大家都以為我好愛蒲，但唔係囉，佢都一樣。佢身材火辣到不得了！但最重要係性格，有啲人會諗自己先，但佢會先企喺你立場諗，同埋我哋鍾意嘅嘢都好似，非常啱Key。」更指母親也非常喜歡Nana：「見過媽咪，真係好好，好難得遇到個啱嘅，想成日同佢一齊！（好多人妒忌你成日有靚女友！）唔好妒忌，我唔係靚仔但都有優點o架！」

至於Nana昨日不但回覆朋友及網友的恭喜留言，更發長文稱對人生有所頓悟：「即將三十歲的我，生活得做個『大轉彎』。意思是，我得『革』自己的命。我要改變，我要讓自己活得更快樂」、「活在當下，才是明智之舉。如果每天都可以這樣過日子，即便哪一天我突然閉上眼睛走了，我都會感到心滿意足，無憾無悔。」不少網友大讚金剛獨具慧眼，找到思想及身材都有深度的女友！

曾偷錢逃學私奔

2014年加入台灣節目《國光幫幫忙》而有「國光女神」之稱的Nana，樣子甜美，擁32D、24、35的魔鬼身材。她曾是台灣Hip Hop組合187INC成員，之後在電視圈及網絡發展，單是instagram已有超過27萬追隨者！常晒性感火辣照的她，曾說父親是法醫又是雕刻家。早年她曾在節目自爆年少輕狂歲月，包括抵受不了母親的嚴厲管教而離家出走、逃學，更和男友私奔，甚至曾賣檳榔為給男友使費，該男友更慫恿她偷走父親10萬元新新台幣，但與男友在酒店睡醒後人財兩空，她驚覺被騙才迷途知返！

另外，金剛舊愛陳蕊蕊指分手後已沒聯絡，不知對方拍拖，問到Nana跟她一樣身材好是否貫徹金剛口味？她說：「唔知，咁可能佢都鍾意呢類型。（發短訊恭喜佢？）唔使啦，咁小事！」