馬貫東戀謝芷倫女友嫌唔夠親密
藝人馬貫東與謝芷倫在處境劇《愛‧回家之開心速遞》的情侶檔大受歡迎，戲中愛得癡纏，戲外亦火花十足，他們希望為感情線加入情敵角色。至於親密戲，馬貫東坦言女友不會呷醋，更鼓勵他去盡啲！
「秦博思」馬貫東（Mark）與「林美香」謝芷倫（Jan）組成的「博香CP」深受觀眾喜愛，他們直言是意料之外，因為本來沒有感情線，加上之前甚少同場機會，故花了不少時間磨合。
唔啱Key即攤牌
講到「CP」爆紅，Mark大爆幕後功臣是其女友，更趁機冧爆「放閃」說：「我喺戲入面加咗好多情侶小動作，網友都留意到話好Sweet，其實有好多都係平時同女朋友現實會做嘅嘢。（女友好支持你哋呢Pair？）佢係Fans嚟，唔止唔會呷醋，有時仲嫌我做得唔夠親密，叫我去盡啲。（女友平時都唔會呷醋？）佢內心好強大，明白我做呢行需要咁做，反而呷我隻貓醋多啲。」
講到角色女追男，Jan自言始終比較傳統，會等男生做主動，加上以前讀女校，最多只試過暗戀鄰校男生。Mark則直認曾有女生追求，但認為對方不是合適對象，故立刻「攤牌」以免產生誤會。問到對「CP」發展的期望，Jan竟然希望出現三角關係：「最好可以安排啲長時間嘅情敵畀我哋，仲要男女各有一個，愈亂就愈有火花。」
盼做鬥氣冤家
Mark聞言也非常配合，笑指：「如果我哋再有新嘅合作，可以試吓啲鬥氣角色，最好一出場就勁晦氣，不停互相整蠱對方。」他們亦希望劇集長做長有，更笑言要幫劉丹破《真情》紀錄，做足二千集！
場地：Cave