胡定欣挑機周秀娜出海再鍊過
早前於劇中「爭寵」的胡定欣及周秀娜，昨午齊齊出席活動繼續鬥，卻是鬥瘦！自認努力增磅的定欣透露，將展開悠長假期，更萌奇想欲與對方組女子滑浪隊一展身手，但問到會否趁機搵拖拍，她則表示隨緣。
胡定欣、周秀娜、麥明詩及馮盈盈昨日悉心打扮現身時代廣場出席「GUNDAM DOCKS AT HONG KONG III」展覽活動，吸引大批宅男圍觀，而香港拳壇「神奇小子」曹星如日前亦現身展覽率先睇。
現場所見，定欣與周秀娜恍如「紙板人」，定欣坦言早前因演出舞台劇才減磅：「肥番晒啦！終於休息，去到年底都唔使拍劇住，不過有啲唔慣。（趁機發展戀情？約咗張振朗？）戀情順其自然啦，（張振朗）咪回應過囉！唔係呀！我想約周秀娜去滑浪就真，組女子滑浪隊玩吓！」當問到會否為定欣介紹男友，周秀娜笑說：「係都介紹畀我先啦！」
盈盈閨房玩「高達Play」
至於身為超級「高達迷」的馮盈盈說：「3年前我就係做高達展嘅模特兒，跟住入行展開演藝事業，亦都喺同一個活動第一次同男友見面，所以希望有關高達嘅活動搞落去，紀念我人生唔同嘅階段。（結婚都以高達為主題？）呢啲梗係閂埋房門先玩啦！」
