李蘊誕「四條發」男B
恭喜李蘊三年抱兩！日前順產誕下麟兒，跟兩歲大的囡囡湊成好字，雖然分娩過程出奇的快，卻承受了比第一胎更強烈的十級痛，最神奇是囝囝的體重跟家姐出世時一樣，都是3.2kg，如此有緣，難怪囡囡對細佬又抱又錫，好有愛。
現年27歲的藝人李蘊昨日在社交網公布喜訊，指「四條發」的囝囝（即2018年8月8日38周）出世了，重3.2kg（約7磅）。榮升第二任媽咪的她分享了囡囡羅紫晞摸弟弟面頰，以及跟老公和初生囝囝的幸福照，相中B仔頭髮濃密，眼仔睩睩，她留言說：「細佬真係錫住媽咪，多謝老公陪產期間一直幫我加油同鼓勵，仲幫我按摩紓緩痛楚。」
已回家坐月的李蘊昨日接受電話訪問時表示BB尚未改名：「叫佢做細佬先，佢同家姐出世同樣磅數，好神奇，本來照超聲波時，醫生話囝囝應重磅啲，呢兩姐弟都幾搞笑。」又指囡囡沒有呷醋，嚷着要抱又錫晒弟弟。
3個幾鐘「快手」生完
問到生產過程，她指上次生囡囡痛了12個鐘，今次只花3個幾鐘：「覺得好快，但比上次痛好多，我諗係度數開得太快，見醫生入嚟，我都話『咁快』？醫生推幾推，就叫我屙個BB出嚟，佢再推幾吓，BB個頭就出咗嚟。」
臍帶纏頸「要識生」
做產檢時BB曾臍帶纏頸，幸影響不大，李蘊說：「生之前都有呢個問題，箍咗一個圈，但順產嚟講，箍一、兩個圈冇問題嘅，生嘅時候配合醫生就得，唔好一次過生出嚟，生咗個頭就要停一停，醫生幫BB解咗條臍帶，再生埋個身出嚟。」由於囡囡食人奶食到歲半，她自信可以全母乳餵哺囝囝。