鄭嘉穎陳凱琳雙喜臨門8．12峇里結婚

下月滿49歲的鄭嘉穎與27歲女友陳凱琳（Grace）因拍攝無綫劇《殭》撻着，拍拖逾三年，因年齡相差22歲，起初戀情不被看好，但兩人未被唱散，反而愈難愈愛，已發展至半同居階段，日前被爆將於下月低調在峇里舉行婚禮，只邀請十多位至親好友見證。

婚訊傳出後，兩人並無否認，身邊兄弟姊妹的反應更露出端倪，林子善回應時玄機盡洩，他說：「Very Very開心！應承咗嘉穎，狗咬都唔可以講，所以我哋只會去，其他嘢我哋唔可以講！」馬國明及唐詩詠前晚出席無綫活動，為免爆響口，竟一反常態避記者，多番要求下詩詠才受訪，不慎自爆下月的旅行計劃受阻，問到送甚麼賀禮？她忍不住說：「如果係呀吓！如果係就要諗吓，我哋應該要夾一份。」

婚後留當地度假

據知，嘉穎與Grace的婚期已定於8月12日！翻查通勝上述日子既宜嫁娶亦宜出行，絕對適合到峇里舉行婚禮的決定。而準新郎於婚後三日（8月15日）就踏入49歲，小登科加牛一確是雙喜臨門！兩人已計劃婚後繼續留峇里度假，與親友慶祝榮升人夫後的首個生日。

記者昨日在Grace位於九龍塘的寓所守候，下午近1時，其父母拖住手離開寓所。問到女兒的婚禮？陳父笑笑口說：「佢哋嘅嘢我哋唔知。（結婚人生大事喎！）遲早嘅事。（陳凱琳唔喺度住？）佢一早出咗去囉！多謝晒，多謝你哋關心，今日又曬又落雨。」陳母則全程笑到四萬咁口，心情勁靚！

此外，有人爆料指昨晨八時許，Grace由媽咪陪同下到九龍法國醫院婦產科做產檢，有傳她已懷孕五至六周，是第二次覆診。不過，Grace與嘉穎早前已否認有孕。