登台遭飛樽掟茄鄧健泓：活生生被污辱！
歌手鄧健泓（Patrick）事隔10年，前晚假旺角麥花臣場館舉行演唱會，獲黎諾懿、陳倩揚及鄭敬基各攜另一半撐場，還有《閃電傳真機》拍檔譚玉瑛及蓋世寶等圈中好友支持。個唱期間，Patrick自爆曾於內地夜場演唱11年，感慨表示當中曾被「活生生污辱」：「試過畀人掟番茄，又飛煙頭、酒樽過嚟！」不過，他認為藝術工作者最緊要令觀眾開心，要做就要做到最好。
介紹首位嘉賓出場前，Patrick深情剖白，很感恩可將興趣當職業「搵錢買麵包食」：「有力氣去照顧家人、創作，令大家重新認識以下落嚟嘅女歌手，我好愛佢！」隨即太太石詠莉（Sukie）以一襲黑色長裙登場，獨唱三首歌的她唱至最後一首歌《完全》尾句時更一度眼濕濕。
與方力申互爆情史
全晚高潮位落在Patrick與嘉賓好友方力申（小方）的互窒，首先互爆女友眾多，Patrick指每次情海翻波，對方總在旁鼓勵，小方即笑說：「阿嫂喺入面啊！」Patrick一於少理繼續講：「當我喊到好似豬頭咁嘅時候，佢打嚟好Sexy講咗句：『你唔好再嘥時間喺一個唔愛你嘅人上面』，呢句說話我記到依家，每次有人失戀都會同對方講。」繼而向小方重複該說話，似影射小方與鄧麗欣分手一事，令小方無力招架，全場即刻拍爛手掌。
講舊愛 老婆唔呷醋
Patrick騷後受訪，講到於台上與小方互爆情史，不怕Sukie嬲？他即讚老婆大方：「佢基本上係個男人嚟！唔介意同埋李施嬅（前度）一齊食飯。而《借醉行兇》係同Marsha（原子鏸）分開嗰時寫，都有問過Sukie介唔介意我講，佢都話唔緊要，最緊要係背後個故事。」
文︰音樂組
攝︰吳文聰