李施嬅被迫吸煙要導演賠肺
向來注重健康的李施嬅，因角色需要慘變「煙剷」，導致皮膚變差，揚言要導演賠肺！至於戒煙多年的陳山聰亦為該劇破戒，兩人可謂為藝術犧牲。
藝人陳山聰、李施嬅與李家聲最近忙於拍攝無綫劇集《今宵大廈》，日前三人在油麻地一幢舊樓的天台拍外景。劇情講述山聰勇救被家聲挾持的施嬅，施嬅一身瘀痕，家聲則血流披面，另一場則是施嬅勸山聰學懂放手。
吸一啖見頭暈
施嬅在劇中一人分飾前世今生兩個角色，由於前世是六十年代的舞女大班，為演活角色被迫煙不離手，身為非吸煙人士的施嬅叫苦連天﹕「因為係捲煙，比較濃，我試過吸完一啖見頭暈。（怕唔怕上癮﹖）我都同導演講要賠番個肺畀我，因為我係個好注重健康同養生嘅人，為咗拍今次個劇都唔知食咗幾多包煙，算係為藝術而犧牲。唔知係咪心理作用，覺得自己皮膚差咗，我都有問劇組人員，我啲牙有冇變黃。」
她透露有場戲與山聰邊吸煙邊講對白，但由於太大煙，連對白也唸不到。除了吸煙外，施嬅還要以聲線、化妝及動作舉止營造風塵味與騷味。問到私下是否在男友面前很騷？她笑言：「我嘅愛情世界係好童話，唔會有風塵味。」
陳山聰：食到想嘔
至於戒煙多年的山聰為拍劇破戒，他解釋：「因為要切合番六十年代個味道，我飾演雜差，要出入賭場同夜總會。（怕唔怕再食番煙﹖）唔會，除咗拍劇，否則都唔想食，食到想嘔，不過為部劇冇所謂。」他又指因為頻頻開夜戲，喉嚨有點不適，已自備私伙湯水補身。而李家聲的角色亦正亦邪，要虐待及毒打其他演員，甚有挑戰性。
文：影視組