陳婉衡遭迫遷趕執平傢俬
無綫小花陳婉衡（Alycia）近日遭「迫遷」，冇彈藥的她無論租新屋或買傢俬都要「慳住使」。日前她被發現到銅鑼灣揀新屋傢俬，主攻千元以下的家品，又買地拖打算自行清潔新居，認真慳家。
Alycia年前隻身由加拿大返港發展，一直名多於利。收入一般的她以相宜租金租住位於香港仔的單位，一住4年「唔捨得搬」，不過近日業主收樓，通知Alycia最遲本月初便要遷出，「驚聞噩耗」的她，剛巧被娛樂新聞台調派出差離港公幹超過一星期，在「冇時間、冇彈藥」下，大感徬徨無助，幸而最終得哥哥出手，成功租得月租萬多元、位於北角的新居。
揀梳化床試瞓
近日Alycia被發現單拖現身銅鑼灣大型傢俬店，主攻「大件抵食」的家品，上至梳化下至茶几、布衣櫃統統唔放過，期間身穿貼身背心的她不時拿着軟尺度位，當睇中其中一張約900元的梳化床時，Alycia意圖「試瞓」，卻不懂如何開床，顯得雞手鴨腳，令不少途人駐足八卦，她卻一於少理！Alycia於傢俬店逗留約個多小時後，再徒步往附近店舖買地拖，平日愛扮靚靚搶Fo的她放下女神形象，與身旁師奶「爭平嘢」，一於慳到盡。
一度擔心瞓橋底
事後記者與Alycia取得聯絡，她無奈地說：「真係慳得就慳嘞，因為今次搬屋唔喺我預算之內，當初好擔心租唔到樓、搬唔切要瞓天橋底！所以揀啲傢俬最緊要平，用得就算，始終係租盤嘛，第時再搬我冇諗住拆走嘞。坦白講，我今次連搬屋公司都冇請，諗住Call車，再搵幾個猛男朋友幫吓手，最多請番佢哋食飯囉。」
文：影視組