已育有兩子的38歲荷里活女星姬赫遜（Kate Hudson），前日在社交網宣布第三度懷孕，成功如願追女的她更懶理粗身大勢，興奮到跳起狂叫！
姬赫遜分別與前夫Chris Robinson及前未婚夫Muse主音Matthew Ballamy生下兩子，即現年14歲的Ryder Russell及6歲半的Bingham Hawn，但依然恨生B。近期低調的她，前日突然在社交網上載短片，與男友Danny以別開生面的方式宣布懷孕之外，更與粉絲齊齊開估BB性別！
身穿白裙的她在片中與家人齊齊拎住黑色大氣球，之後用針拮爆，隨即飛出細小的粉紅色波波，代表她懷有B女！得知生女之後，全家興奮到不停歡呼，姬赫遜更開心到跳起，真係睇見都牙煙！她又留言表示：「驚喜！如果你之前諗緊我點解喺社交頻道冇晒影，咁係因為我從未如此不適過！佗過咁多次以來首次頭三個月佗得咁唔舒服，如果你見過我外出時微笑及扮到所有嘢好好……我其實係講緊大話！」
姬赫遜與男友Danny認識10多年，直到去年才開始拍拖。上星期她接受訪問時表示想同男友組織家庭，並想再生仔女，更指如果生女就好好玩，今次終於得償所願！
文：外娛組