衛詩雅愧對父母崩潰爆喊
藝人衛詩雅近日拍短片，盡訴入行十周年心聲，講到零收入的坎坷歲月，她即崩潰爆喊，自責愧對父母。詩雅亦自認慳妹，出入貼地坐巴士，揚言即使將來很有錢都未必請司機。
去年工作不斷的藝人衛詩雅為記錄入行十周年，特地拍了一條短片講出心聲，期間講起父母時不禁掉眼淚！她直言入行多年試過有兩、三個月完全沒有收入，要靠公司墊支幾千元維持生活。詩雅又自認慳妹，冇錢的話就不出街，留在家中吃媽咪煮的飯：「我可以唔出街唔使錢，之前做嘢啲錢都會儲低慢慢用，工作可以借衫，同媽咪住又可以留喺屋企食飯，游水就去沙灘游，有錢先去泳池。」
「咁大個仲要佢哋擔心」
詩雅愈說愈激動，眼淚終於決堤：「其實我覺得對唔住屋企人，自己都三十幾歲，父母有時講笑，叫我快啲拍拖，又話唔介意我收入，我咁大個女仲要佢哋擔心，好冇用。」她自言如果不是做娛樂圈，父母可能不用擔心這麼多：「但因為我硬頸，令佢哋承受不必要嘅嘢。」
貼地唔亂使錢
詩雅在等巴士及坐巴士期間拍片，表現貼地一面，她自爆試過去維修手機時，服務員竟說：「你係明星喎！都要整電話？」她表示做明星不一定有錢，而且不會隨便買新東西，即使將來可能很富有，都會做回自己，未必會請司機。她笑言多年來考獲不少牌照，同事都叫她「牌王」，包括車牌、船牌、潛水牌、導遊牌、寵物傳心術及中醫初級證書，趁有空就努力增值自己。
文：影視組