現年48歲的荷里活著名影星珍妮花安妮絲頓（Jennifer Aniston），與結婚兩年的46歲影星老公Justin Theroux再傳婚變，兩人聖誕前吵大鑊，Justin更搬到酒店暫住！
據報道指珍妮花與Justin本月14日在位於比華利山Bel-Air的愛巢吵大鑊，知情者說：「嗰場係愚蠢嘅爭執，係大部分情侶都有過講唔掂數嘅嗰種，不過今次情況就失晒控，珍妮花更因而癲晒！」有指Justin一怒之下離家搬到比華利山酒店居住。知情者又指珍妮花令到Justin感難受，他於老婆「動手」前離開，對雙方都是好事。
吵架翌日早上，有多名朋友到酒店探訪Justin，有指他在酒店餐廳向友人「訴苦」約一小時，直指珍妮花過晒火位，之後他返回房間，堅拒返家。兩人因鬧翻，取消每年例必舉行的聖誕派對。據知，Justin與珍妮花除了因工作關係而長時間分隔兩地外，Justin亦好花心，最近他拍攝新片《Maniac》時，與奧斯卡金像影后愛瑪史東（Emma Stone）打情罵俏。友人表示擔心如果Justin與珍妮花不盡快解決問題，遲早玩完。
不過，盛傳婚姻已「危危乎」的兩人，於12月27日被影到與影星好友Jason Bateman夫婦一同到墨西哥聖盧卡斯角旅行迎接新年，未知是否想藉今次旅行來箍煲。至前日珍妮花與Justin被影到在酒店泳池戲水，火速「復合」，關係似已緩和。
文：外娛組