黃心穎自嘲老喇！馮盈盈狂擦師姐鞋
黃心穎昨日在《勁歌》頒獎禮綵排中大騷舞技，但受訪時卻自嘲老人，拍檔馮盈盈即賣口乖，師姐前、師姐後盛讚對方舞功高強，盡顯襟撈之力。馮盈盈又大爆拍MV時一班女仔成日爆軚，預告正式表演時會有「爆破」效果！
藝人黃心穎、蔡思貝、馮盈盈（Crystal）、張寶兒和邵珮詩，昨日在將軍澳電視廣播城為今晚直播的無綫《2017年度勁歌金曲頒獎典禮》表演項目綵排，更因落力跳唱舞曲版《到此一遊》而香汗淋漓。心穎受訪時，自言好耐冇試過跳得咁激：「我老喇！」Crystal聞言即賣口乖：「唔好咁講啦，師姐！」更擦靚心穎對鞋，大讚對方舞藝底子好，帶領一班女仔更上層樓，襟撈程度爆晒錶。
動作大頻頻爆(車犬)
提到MV大受好評，拍攝時可有蝦碌場面？Crystal即大爆一班女仔成日爆(車犬)：「都係啲袖位爆，因為動作太大。（上台再着件衫，又爆多次？）到時前面有煙花，我哋都有爆破效果！」而在MV中紋身的心穎，坦言想趁30歲前整個真紋身，但不會與緋聞男友馬國明齊紋有對方名字的愛的紋身：「有人咁做(o既)話，會用鏹水抹咗佢！」
蔡思貝被撞賴司機
至於蔡思貝日前被本報獨家直擊，遭租用的汽車撞到險仆，她直言只怪自己後腦冇眼：「佢（租用車司機）應該睇住人嚟停車，嗰一刻真係有啲嬲，但都按捺住自己上車。」又謂不會叫男性朋友做「柴可夫」，會盡量改搭公共交通工具。
文：影視組