鄧健泓「Keep住造」 石詠莉冧爆：好嘔呀！

43歲藝人鄧健泓與拍拖五年、31歲的石詠莉昨日在九展舉行婚禮，下午進行簽字儀式後見傳媒，並應要求連咀兩次，又騷手上的結婚戒指，穿低胸婚紗的Sukie有少許離罩。至於陳倩揚與丈夫則到場見證，並在社交網送祝福。

Sukie透露簽字時有眼濕濕，Patrick則說：「頭先註冊慶幸冇人反對，我就冇喊，出奇地冷靜，可能我比較有型，同埋腦入面不斷諗緊今日嘅情況，所以尋晚冇乜點瞓。」Sukie亦指前一晚心情複雜，除多了另一個身份外，還想起以往雙方一起經歷的事，結果僅睡兩小時。

押後度蜜月避年

談及晚上的講詞，Sukie自嘲不善詞令，寄望不超過十秒時間完成，Patrick即揶揄她：「佢講十秒即係會講廿分鐘！（幫太太講？）我都有自己嘢講，睇佢『賴嘢』囉！」Patrick透露婚宴上會向太太獻唱對方從未聽過的歌，又指婚禮花六位數字，感謝各方提供的贊助及折扣，問是否慳了不少？他說：「鑽飾贊助七位數字，結婚戒指入面印住P.S I Love You，係Sukie第一隻自資唱片入面嘅暗藏訊息，其實當時想話畀大家知，我哋拍緊拖。」

鄧健泓完美示範娶個老婆返嚟錫！	石詠莉與鄧健泓在婚宴上致詞時感動落淚。	鍾麗淇透露除夕會與周家蔚度過。

問到可有生育計劃？Patrick說：「你想問我哋係咪Keep住造？但計劃係未有，順其自然啦！想多啲時間過二人世界先。」Sukie撒嬌說：「你好嘔呀！不過我成日聽嘅！」兩人指婚禮後各有各忙，要2月初才度蜜月，預計玩三星期順道避年。

甄詠珊見證相識12年的好姊妹出嫁。

鄧健泓與舊拍檔蓋世寶（左）及譚玉瑛重聚。

晚宴筵開20席，場地以白色簡潔布置為主，每枱均以一對新人的歌名取代枱號。開場時Patrick大唱情歌，而石詠莉在台上多謝父母時一度嗚咽，及後多謝奶奶及Patrick時，終感動落淚：「以前我嘅世界好多無言、無奈，但識咗堅強嘅Patrick後，我嘅世界多番色彩，再冇感嘆號，依家係逗號！」Patrick則叫來賓不要灌醉他，因今早他要工作。

甄詠珊：得我未嫁得出

到賀賓客有Sukie的Freeze隊友甄詠珊、黎諾懿夫婦、鍾麗淇、小儀及譚玉瑛等，甄詠珊表示跟Sukie認識近12年，一早已知她恨嫁：「三名成員得我未嫁得出，我努力中，交畀上帝！（2018年有好消息？）希望啦！」鍾麗淇則透露患有基因病「四號染色體缺損綜合症」的6歲大女身體有進步，除夕考慮帶她離港，並會跟好友周家蔚一同過，對於家蔚老公洪天明早前被拍到拖女，她說：「過去由佢過去，佢有同我提過，但相信佢哋最清楚，唔擔心。」至於Patrick好友陳志雲因綵排舞台劇未能到賀，由電台高層梁泰來代送賀禮。

文：影視組