君如喪改劇本吳鎮宇方中信呻苦

吳君如、方中信、吳鎮宇、王菀之、江美儀與組合農夫等，前晚到金鐘出席電影《妖鈴鈴》香港首映禮，處女執導兼主演的君如獲父母夏春秋夫婦、衛詩雅、張達明等撐場。鎮宇和方中信接受訪問時投訴君如，指她經常改劇本。提到方中信於戲中以「地中海」示人，他笑言不介意犧牲型仔樣：「大家都辛苦，都有犧牲。」但鎮宇踢爆方中信雖然勁Like頹爆造型，但擔心影響其髮型用品代言工作。

唔捱夜寧拍動作戲

鎮宇笑言經過多晚通宵拍攝，患上「夜班恐懼症」：「唔係唔想拍，係真係頂唔到，可能拍動作戲仲好啲。」又指監製陳可辛要求高，經常要求補拍。問到是否要君如好好報答？他說：「票房好啲就得，君如都有答應送嘢。」

懷疑老竇中六合彩

至於君如坦言為電影碌爆情人卡：「撐我嘅都係情人，我好感動。」又笑指搞到方中信禿頭，被對方的女粉絲責罵：「要多謝佢哋咁撐我呢個小學雞導演。」提到有指君如向父親送上冇簽帳上限的信用卡，她承認有送，但父親從未用過：「我懷疑佢真係中過幾條六合彩，唔係點會我冇埋過單呢？（話你有三億身家？）我睇到都嚇一跳，原來陳可辛收埋咁多！其實啲錢都係佢拎嚟投資電影，今次我搭景用二千幾萬，佢仲話我不知天高地厚，我都三年冇搵過錢，幾套戲一個仙片酬都冇，我都希望呢套戲收得，咁我身家又多幾個億。」

衛詩雅打扮靚靚睇首映。

夏春秋與老婆到場撐君如。

文：影視組