麥家琪帶女觀戰K.O.麥紫莉

藝人麥家琪、麥紫莉（Chili）、鄧穎芝（Vangie）及郭思琳等，昨日到銅鑼灣出席ViuTV節目《G-1格鬥會II》記者會，她們以Bra top谷胸上陣，以擁有36G上圍的Chili最吸睛，男教練不敢直視！42歲索媽麥家琪則帶同女兒到場，5歲的以晴在擂台下幫媽咪打氣，見到閃光燈即說：「你哋唔好影我，影媽咪啦！」

Chili簽約接散Job

講到囡囡到場力撐，家琪笑說：「係我要做工人湊住佢先啱，個工人返去開士多，一日賺到1,000蚊，點留得住呀！今日都係帶佢嚟睇吓媽咪嘅工作，有苦有樂嘅。（囡囡好活潑？）我叫佢表現得開心啲，始終係小朋友，佢仲話帶書嚟讀，我話讀乜書，放假就休息吓啦！」至於曾借拍AV炒作的Chili，透露已與新經理人簽約一段時間：「都有接啲散Job，錄吓化妝影片。（之後想向邊方面發展？）想多方面發展，自己就想唱歌，走陽光路線。」問到她拍攝《G-1》時膝蓋受傷，會否繼續格鬥運動？她說：「都想繼續打拳、做教練，不過隻腳韌帶始終係有傷，需要時間康復。」

放大圖片	麥紫莉已簽約新經理人公司。	麥家琪有阿女打氣，勝算都大啲！

郭思琳男女埋身砌

身為《G-1》師姐的郭思琳早前考得巴西柔術藍帶，在擂台上瞓身做人肉沙包，為師妹示範動作，穿Bra Top的她不時要以手護胸防走光。講到師妹抗拒巴西柔術要與男士扭打，思琳說：「因為扭打係好多汗，唔似大家上網睇片咁靚一靚，好多時係打到眉都甩埋，我都有同啲男士打。（會尷尬？）唔會，因為有着袍，要睇你練習時諗緊乜，我就諗住練習，唔會有生理反應。（怕對手有生理反應？）好彩暫時未遇到。」

Vangie學格鬥術保護自己，但笑言被靈異事件嚇親：「早排我去巴士站接媽咪，點知離遠有個女人行埋嚟，佢冇着鞋只着睡衣，佢企到我旁邊咪問佢有冇事，佢竟然話『我唔係人嚟！』（咁點算？）好彩媽咪都見到佢，冇理由兩個人都撞鬼，但當下真係嚇親！」

文：影視組