陳敏之爆唐文龍睇病被護士圍

演員李司棋、夏雨、米雪、關菊英、陳敏之、唐文龍和黃翠如等昨日到黃大仙宣傳無綫劇集《溏心風暴3》。人妻陳敏之在劇中與唐文龍大玩不倫戀，連日來上演多場火辣親熱戲，前晚更在泳池鴛鴦戲水情不自禁錫錫。

老公擰頭冇眼睇

陳敏之大爆劇中不時騷肌的唐文龍被女護士包圍，她笑說：「依家好多女仔垂涎唐文龍嘅胸肌、麒麟臂，練咗咁耐冇白費。佢好專業，拍之前會做掌上壓令線條靚啲，我啲女仔朋友都想搵佢影相，我話：『唓！我都試過、你哋就未摸過啫！』哈哈！佢去醫院睇醫生畀啲女護士圍影合照，佢太有型，啲護士都頂唔住。」唐文龍笑說：「我之前去咗嗰間醫院10年，之前都冇人理我，咁耐冇拍劇，當然唔想令大家失望。」陳敏之透露激情戲至今老公還沒看過，她笑說：「老公思想成熟嘅，但係我情願佢唔好睇，佢返嚟冇黑面，只係擰晒頭冇眼睇咁嘅樣啫，哈哈。」

陳敏之和唐文龍鴛鴦戲水兼錫錫。	黃翠如落力為新劇造勢。	李司棋、米雪、夏雨和關菊英等派紀念品，氣氛熱鬧。

此外，唐文龍昨日到電台接受訪問，透露與陳敏之的床戲被刪減了6、7成，可能是受「限奶令」影響：「其實都可惜，我唔係想大家Focus嗰部分，但嗰部分有我哋嘅文戲，之間嘅眼神同無奈。我哋嘅角色好爭議性，佢一定會畀人話小三，我就會畀人話係PK、賤男，但希望觀眾明白社會有呢個情況。」

李司棋要鬥長命

至於李司棋回應被雜誌指身體出問題而有意停工養病，她指最近抽血報告顯示身體好到不得了：「過咗去喇，雜誌都寫咗幾次，依家狼來了都好嘅，以後冇人信我病。依家身體OK，會更加愛惜自己，鬥長命等佢哋知道我冇咁易死得去。」又表示未言休，笑說：「個樣仲睇得咪做囉，如果皺晒皮就要喺屋企抖吓，依家精精神神，生生猛猛，唔做嘢喺屋企做咩呢？」

文：影視組