龕位受發牌制影響朱潔儀愁爆葬母受阻
「港姐畫家」朱潔儀昨晚出席保良局慈善晚宴活動，透露其母親在兩個月前離世，但因受近月骨灰龕場的發牌制度影響，亡母的骨灰要暫放殯儀館：「一早買咗私營骨灰位，但冇得上位，話因為政府未發牌，所以唔可以上，好奇怪，明明畀咗錢，有晒契，特登買咗喺爸爸個位隔籬，唔知點解！香港人生前為住都咁煩，估唔到先人都受影響！」
而擔任保良局兒童大使的鄭嘉穎自言一直有助養兒童，談到好友賴慰玲喜得麟兒Marat，身為契爺的他說：「好開心佢用咗我幫佢改嘅英文名，見到契仔咁得意，當然開心！（感染你快啲做父親？）唔係比賽，每個人時間表唔同，有（小朋友）就當然歡迎。（結婚先？）通常都係，但都會有意外，好似賴慰玲咁，一步一步嚟！如果結婚會公布，暫時未有計劃！」
同場的方中信上月被入稟高院民事控告，指他的銀行戶口去年接收歐洲民航機集團旗下一間公司約116萬港元，現公司要求取回款項，他說：「唉！三個字：犯太歲！之前風水師傅話我今年會好黑仔，之前撞兩次車，又發生代言人事件，跟住最近有民事訴訟，頭先揸車為避隻野豬仲爭啲撞車！依家交晒畀律師處理，等完成法律程序先可以透露！（點化黑氣？）過埋呢一年啦，捱埋就冇問題！」
