Sylvia鄉村妹出頭殺入荷里活

模特兒出身的Sylvia，是一個國際影壇陌生的名字，但其實她在故鄉已經拍戲10年，她受訪時表示：「我14歲起做模特兒，幫到我變得外向，但我夢想係讀戲劇學校。我從未夢想過做模特兒，但我鍾意周圍去，因為我嚟自荷蘭一個小鎮，長大嘅地方只有一個超市、一間學校、一間髮型屋。我喺一個星期日落雨時望出窗，同自己講一定要離開呢個地方。14歲嗰時我做到模特兒，畀我離開去旅行嘅機會，但我想做嘅係演員，模特兒只係憑佢哋嘅衫講5秒故事，我想有更多時間同深度去變成另一個角色，創造另一個世界，我一直都想做一個講故事嘅人。」其後Sylvia就讀荷蘭一間著名演藝學院，翌年首次拍戲：「我喺片場好自在，我鍾意演戲多過現實。」拍荷蘭片多年，她今年終於憑經典科幻片《2020》（Blade Runner）續集《銀翼殺手2049》正式於荷里活登陸。

精通多國語言

身為原版粉絲的她，形容拍續集如進入糖果店的細路，又大讚導演Denis Villeneuve、拍檔夏里遜福（Harrison Ford）與賴恩高斯寧（Ryan Gosling）很熱情，很高興可以參與演出：「係我第一部美國片，我拍過大型歐洲片，但呢部仲大好多，真係好正！我直頭要搣自己，我唔明點解拍到呢部戲，有機會同Denis Villeneuve及Roger Deakens（攝影指導）合作。我識講荷蘭文、德文、法文同英文，都演過要講呢啲語言嘅角色，但我好鍾意美國體驗，休息車豪華好多，仲多好多零食！」

Sylvia自言小時候已是美國影視作品的粉絲：「我嚟自荷蘭南部一個小鎮，嗰度冇乜嘢做，所以淨係睇美國電影同電視劇，由細睇《通天奇兵》（The A-Team）、《神探俏嬌娃》（Charlie's Angels）同《幻海奇緣》（Edward Scissorhands）睇到大。」

增7公斤肌肉

Sylvia在片中飾演謝勒力圖（Jared Leto）的手下女殺手，她透露謝勒堅持方法演技，全程留在角色中，初次見面已用角色名字互相介紹：「我哋事前冇討論角色同綵排，對我嚟講係好唔同嘅體驗，因為我同佢唔係好熟，戲情交代我要花好多力氣去得到佢認同。」為應付大量動作場面，她苦練增加7公斤肌肉：「我每日跟三項鐵人選手訓練6個鐘，舉重、帶氧運動同踩單車。」　

名花有主 頻頻放閃

Sylvia Hoeks已經名花有主，男友是荷蘭搖滾樂隊King Jack的主音兼低音結他手Boaz Kroon。

Sylvia在2013年開社交網Instagram戶口後，已經不時上載兩人的合照，Boaz亦在自己Instagram公開甜蜜拍拖與放狗的照片，俊男美女，相當登對。

文：外娛組