任達華自責失職累囡囡長腿餵蚊
影帝任達華（Simon）難得近日有空檔，頻頻與太太琦琦出席活動，昨日又以夫妻檔現身品牌開幕活動，二人襯到絕型爆登場。Simon說：「我部電影因為劇本問題改期，所以有時間同太太、囡囡去旅行，好難得。我下星期就開工，有排忙。」
痕到冇覺瞓
兩人表示一家三口去了泰國旅遊，此行逗留六日，玩得盡興，可惜女兒任晴佳在當地被蚊子叮了47次，Simon說：「我哋去咗個私人沙灘，囡囡曬太陽，但我唔記得咗同佢搽防曬同蚊怕水，所以吸引咗好多蚊，我好心痛，佢對腳又長又靚，我每晚都有幫佢按摩同搽藥膏，佢痕到瞓唔到，當日琦琦出咗去，係我冇盡爸爸責任。」
琦琦唔怪老公
問到琦琦有否怪責老公？她坦言：「冇，佢都好內疚，仲心痛過我。」琦琦稱很久沒有一家人去旅行，Simon為女兒拍了幾百張照片，當中不乏比堅尼照：「囡囡同老公一樣鍾意健康膚色，又鍾意潛水，佢可能喺假期食得好、瞓得好，放完假又高咗。佢依家12歲，有1米70高，有模特兒身材，比例仲好過我，佢之前同爸爸度腳長，囡囡對腳已經長過爸爸。」
文：名人組