荷里活32歲型格女星朗妮瑪娜，自爆曾因形象太Cool而被監製嫌棄，爭輸飾演「好傻好天真」的角色，令她扯火爆粗，同時亦被42歲男友華堅馮力士大爆同居生活！
憑《龍紋身的女孩》（Girl with the Dragon Tattoo）嶄露頭角的朗妮瑪娜（Rooney Mara），雖然現已躋身一線，但原來仍要為角色試鏡，與其他對手爭崩頭。她亦坦言未必每次都能夠成功獲選：「啲監製會覺得我《龍紋身的女孩》形象太深入民心，認為我唔夠天真同單純。呢件事正正發生在我拍攝《卡露的情人》（Carol）之後，不過當時電影仍未上映。我在《卡》片內的角色，真係好天真。我相信未來某時刻又會出現相反的局面，變成嫌棄我不夠有性格、不夠前衞。不過這只會令我變得更大膽，令我更想講：『X你啦！』睇我有幾天真、幾單純！」
談到試鏡過程，朗妮亦坦言感覺好糟糕，一點也不享受：「為角色試鏡就好似去見工一樣。你要以特定的裝扮見人，又要以特定的動作舉止表現自己去迎合遊戲規則，對於呢方面，我真係好唔叻，唔識點去應付呢件事。」話雖如此，但朗妮的作品一部接一部，演出時更獲得正面評價。
而她早前便跟華堅馮力士（Joaquin Phoenix）繼合拍《觸不到的她》（Her）後，再次合作新片《Mary Magdalene》，二人分別飾演「抺大拉的瑪利亞」及「耶穌」，更因此片而撻着，於今年5月首次以情侶身份公開亮相康城電影節，朗妮更見證華堅憑《You Were Never Really Here》封影帝。
據知二人現時已進展到同居階段，日前華堅更難得公開透露，與朗妮在荷里活山大宅同居的生活：「我通常9點就會瞓，朝早6點起身，因為朗妮想睇，所以我睇咗犯罪紀錄片《The Staircase》，我本身好少睇新片。」十足老夫老妻一樣。
朗妮的姐姐姬瑪娜（Kate Mara）同樣是圈中人，但性格卻截然不同，朗妮說：「姐姐性格相比起我而言好好多，大家都比較鍾意佢。姬喺十歲時已好清楚知道自己想拍百老匯劇、創作音樂同演戲。可能因為我個人性格比較偏門，我卻想返學多過去做童星。」朗妮又指閒時最喜歡自由自在地去旅行：「但就好憎有好多行李跟身，去旅行時，最好你乜嘢都冇，冇得揀就最正。」
文：外娛組