一屋三雞 葉翠翠想追豬BB
藝人葉翠翠昨日以代言人身份出席食品簽約儀式，老公周曉東帶同五個月大的兒子周津羲到場，翠翠受訪期間，老公在旁抱着囝囝玩，盡顯父愛！翠翠透露印傭近日回鄉，大部分時間都是老公照顧囝囝：「佢返工就我湊，我請工人之前佢講明唔鍾意小朋友，嗰時我仲未懷孕，所以佢依家都唔湊囝囝。（囝囝易湊？）有時佢唔瞓要同佢玩。」
翠翠指囝囝現時有23、24磅重，名字由師傅提議要有多少筆畫，老公約揀了十個選擇，再由老爺奶奶決定。問到會否打算再追B？翠翠說：「我同老公、囝囝嘅生肖都屬雞，已經有三隻雞，想生豬B，雞同豬會夾啲，可能到豬年年尾至生。（你老公同BB以父子裝撐場。）老公成日都話唔使幫佢買，話要同囝囝配搭。」
