吳業坤 JW屎坑橋谷歌

歌手合作經常有，但唱到去廁所Gathering確實只有吳業坤（James）和JW這對「雙J」合璧，他們為破格宣傳，更將歌詞貼在商場廁所！昨日坤坤和JW親自到商場廁所巡視這條「屎坑橋」，坤坤稱是填詞人陳詠謙想出來：「佢話有乜地方係男女分隔得最開？就係男廁同女廁，呢首歌雖然係合唱，但男方同女方嘅歌詞分得好開，我代表男仔，JW就代表女仔，所以就諗到宣傳橋就係將男嘅歌詞放喺男廁，女方嘅放喺女廁，感受雙方都入唔到對方思路。」

唔睇牌入錯女廁

不過，坤坤和JW懶理男女「禁地」，在男女廁間不停穿梭游走，除拍下「屎坑照」外，更在男廁即興拍了「廁所版」的《原來只因深愛着》MV，坤坤站在尿兜前高歌，而JW就由廁格出來與他相遇，兩人最終都忍不住爆笑NG。JW笑言在男廁唱歌機會難得，原來她兒時曾入錯男廁解決：「出嚟時啱啱有個男仔入嚟，嚇到我衝咗出去。」而坤坤自爆經常誤入女廁：「因為我唔睇啲牌，見公仔牌有條嘢我就以為係男廁囉。最近都試過，好彩個侍應叫停我，唔係就大件事。」

廁所鏡上貼有坤坤和JW合唱歌的歌詞。	JW自爆兒時曾入錯男廁。	坤坤用V字手勢賣萌遮髮線。

破天荒貼地宣傳

講到歌詞應貼埋入廁格，讓大家邊「解決」邊唱歌，JW笑言：「我哋有諗過o架，但係我哋想靚啲、唯美啲嘛，依家望住塊鏡嘅歌詞又可以影吓相。」坤坤則說：「而且呢個年代嘅人去廁所都會玩手機，唯一鏡係最能夠吸引人放低電話，都係一個幾好嘅構思。」今次在廁所Gathering宣傳新歌，坤坤笑言：「我諗呢個都係破天荒，係全港第一對合作單位用廁所嚟宣傳情歌。」JW則說：「我哋就想試吓點樣可以貼地啲，啲歌詞可以行街見到，會有親切感多啲。」

坤坤和JW玩轉廁所後就返電視城趕拍新劇《誇世代》，他稱早前帶媽咪到沖繩拍新歌MV，出發時因黑色暴雨而遇九霄驚魂，他說：「喺空中遇氣流，好似坐過山車咁。」見坤坤胖了又黑了，他解釋：「係唔夠瞓水腫，同埋係咁食同飲啤酒，我都係放棄戒酒。」

文：音樂組

攝：劉智源

場地：朗豪坊