香香踢走苟姑娘翹古天樂
【龔凱欣廣州直擊】「香香公主」岑麗香與苟芸慧（苟姑娘）曾是兩大女神，可惜近日苟姑娘身形暴脹，吸引力大減。連品牌都轉軚找來香香配古天樂擔任活動嘉賓，雖然香香力撐苟姑娘過往在加拿大時的身形fit爆，但無奈她已完全取代對方的女神地位。
型男古天樂及岑麗香昨日於廣州出席鞋履品牌le saunda活動，大批古仔粉絲見到偶像出場時即不斷尖叫。其後，二人又擔任壓軸模特兒，香香翹着穿上兩吋窩釘「高踭鞋」的古仔行騷，非常登對。
首次與古仔合作的香香坦言很開心，問她有否被古仔電到？她說：「冇呀。（佢係咪你鍾意嘅類型？）男仔外表唔係最重要，最重要睇點相處，同一個人一齊要好舒服。我依家都係等緊神嘅安排。（頭先有冇同佢相處？）啱啱落車就做嘢，我哋喺台上面相處。」
面有肉係福氣
該品牌上次邀請了苟芸慧（苟姑娘）為嘉賓，而今次則由香香頂替，香香表示自己只聽從公司安排，自己並沒留意太多，問到她對方減肥的進度？香香回應：「希望大家唔好畀咁多壓力佢，我哋都喺加拿大返嚟，佢嘅身形喺嗰邊好完美，最緊要健康同開心。我啱啱嚟香港嗰陣，見到啲女仔好瘦，開頭唔慣，有時塊面有多少少肉係福氣。」
接受男人着裙
而問到古仔夥拍香香及苟姑娘有何不同感覺？他說：「唔係好知，喺廣州做嘢搭好耐車，過程一定會瞓覺，見到佢（香香）都未回魂，同佢冇乜傾過偈。」至於問他睇女仔第一眼會留意甚麼部位？他笑言：「我好少第一眼睇女仔，通常望地下。」另外，喜歡買鞋的他自爆曾在歐洲購入一對四吋高的鞋，亦曾穿過出席活動，問他敢不敢着裙示人？他回應：「其實都係fashion啫，除非條裙過短，如果膝頭對上少少都OK。」