女兒8個月大叫媽媽鍾嘉欣：我嗌咗出嚟！

星媽鍾嘉欣近日返港，昨日與名模Ana R.到中環出席活動。身穿白色長裙的嘉欣講起女兒Kelly即一副冧樣，指女兒已9個月大，最近識得開口叫媽媽：「好記得4月17日佢第一次叫媽媽，4月22日叫DaDa即係Daddy，最近就識講Hi。（第一次聽到佢叫媽媽心情點？）我嗌咗出嚟！開頭有疑問，因為我會叫佢食Mum Mum，但原來佢真係嗌我！我行開時佢就會叫我！好嗲！（爸爸有冇呷醋？）冇嘅！最緊要健康！」她又透露已陸續接Job，前日便為劇集《溏心風暴3》錄製英文插曲，問到遲些會否跟女兒合唱？嘉欣笑言已作了多首兒歌，將來有機會可放入廣告中，至於會否讓女兒客串拍廣告？她說：「睇吓咩類型，我有同老公商量過，如果係好品牌，留個紀念都好，第日畀佢睇番。」同場的Ana R.帶埋女兒Myar出席，活動期間Myar一度爆喊，但上台後變得相當乖巧，還為母親揸咪！